意盃：副選落場仲搏國米大盤尼料_東方日報

今晚繼演意盃16強，國際米蘭主場火併烏甸尼斯。國米今場或派遣副選迎戰，不過祖亞昆哥利亞及大衞法迪斯等並非善男信女，難得擔正更加搏命；烏甸防守唔算穩陣，加上近年碰頭例演入球騷，2.5球大盤可取。（周五凌晨4時開賽）

國米啱啱喺聯賽大炒拉素6蛋，匆匆再戰意盃，預計主帥施蒙尼恩沙基會進行輪換，事實上佢哋班副選唔講得笑，意大利國腳大衞法迪斯落場每每交到貨，今季已有3球進帳，祖亞昆哥利亞、基斯贊阿斯蘭尼及泰尼米亦有一定質素，難得上陣唔會揸流攤，隨時更搶韁。國米喺主場出擊偏重進攻，各項賽事連續11場主場都有波入，今場必喪攻爭晉級。

烏甸尼斯作客場場失波
另邊廂，烏甸尼斯雖然近兩圈意盃均大勝夾埋入7粒，但佢哋防守欠穩，各項賽事近8場作客場場有失波。翻查紀錄，兩軍近6次交手，全開3球或以上，主Ｗ太熱冇肉食，轉捧2.5球入球大好過。