歐聯：作客腳軟阿仙奴捱細界_東方日報

歐聯賽事，英超勁旅阿仙奴作客葡萄牙「1哥」士砵亭，睇牌面阿仙奴可能略高半線，不過「兵工廠」喺歐聯有「作客病」，連續4場歐聯作客食白果；士砵亭主帥魯賓艾摩廉離隊影響未明，今場都會穩打穩紮，博2.5球入球細係最好選擇。（Now 639周三凌晨4時直播）

阿仙奴上輪作客0比1輸畀國際米蘭，想確保出線當然要努力搶分，不過佢哋歐聯作客演出極差，近5場歐聯作客2和3負，期間只入過1球，5場總入球全開2球或以下。唔好忘記，阿仙奴喺22/23球季歐霸盃16強，就係同士砵亭兩回合都打和，最後互射12碼被淘汰，今場肯定唔敢輕舉妄動。

士砵亭易帥先求穩
士砵亭有人氣射手約基利斯壓陣，今季葡超11戰全勝所向披靡，但係主帥魯賓艾摩廉今月轉教曼聯，對球隊肯定有所影響，雖然新帥祖奧彭利拿首次領軍喺葡盃大勝6比0，但對手只係葡萄牙第3級別聯賽球隊，唔可以作準，今場對住歐洲最佳防守之一嘅阿仙奴，踢法會穩陣行先，開2.5球入球細機會極高。文:工廠仔