女英超：新兵融合火速撻着女紅魔主Ｗ趁熱食_東方日報

女子英超有好戲碼，曼聯女足主場迎戰熱刺女足。今場係上季女子英足盃決賽翻版，當時曼聯女足喺溫布萊球場大炒熱刺女足4比0捧盃，可見雙方實力差距相當大，而且曼聯女足往績食住熱刺女足，預計主場出擊必無保留力爭贏波，主勝咪錯過。（Now 635周日晚上7時30分直播）

上季尾女子英足盃決賽，「女紅魔」大勝熱刺女足，陣中主將艾娜東尼上半場先開紀錄，瑞秋威廉絲下半場整多粒，再加上露茜亞加茜亞梅開二度，最終大勝4比0奪冠。新球季曼聯女足人腳有唔少變動，露茜亞加茜亞同隊長凱蒂施琳離隊，但簽入更多猛將，例如荷蘭女足嘅杜明妮姬贊臣、挪威射手泰蘭特等，在剛開季的女子英超表現理想，連挫韋斯咸女足及愛華頓女足，上場又在女子英聯盃2比0擊敗利物浦女足，錄得3連勝，3場入6球不失1球，相當出色。

熱刺女足士氣受挫
熱刺女足今季已進行4場比賽，包括3場女子英超及1場女子英聯盃，錄得2勝1和1負，佢哋上場剛以2比3不敵利物浦女足，士氣受挫，今次遇上實力更強的曼聯女足，恐怕凶多吉少，加上「女紅魔」近6次正式賽事對熱刺女足，錄得5勝1和成績明顯佔優，今場主勝值得睇高一線。文:邪神