歐冠：對西甲兵有心得 里爾細抗皇馬_東方日報

上屆歐聯盟主皇家馬德里今晚再度出擊，作客法甲里爾。「銀河艦隊」經過季初嘅適應期後，近排成績已經回復穩定，不過經歷連場硬仗，教練安察洛堤實行安全至上，作客相信會踢得較為保守，只求贏波袋3分不望大炒，2.5球入球細機會高唱入雲。（Now639周四凌晨3時直播）

銀河艦隊穩中求勝
皇馬3日前先踢完「馬德里打吡」，球員耗力甚多，雖然早前報稱要養傷3星期嘅麥巴比火速康復，但預計「肥安」會睇情況先決定派唔派佢落場。事實上呢位意大利名帥向來重視攻守平衡，尤其歐聯作客甚少主動搶攻，「銀河艦隊」近4場歐聯作客，有3場總入球開2球或以下，今仗繼續穩中求勝。

里爾開季表現麻麻，歐聯首仗對士砵亭都輸波而回，上場聯賽擊敗勒哈弗爾，總算終止5場不勝頹勢，對球員信心點都有幫助，主場面對強敵皇馬，會加強防守以1分做目標。

事實上里爾近9次歐洲賽主場對西甲球隊，總入球全開2球或以下，證明主場應付西甲兵頗有心得，入球細值得再追。