今晚北倫敦打吡爆發！由熱刺主場迎戰阿仙奴。兵工廠今場需要改穿黑色作客波衫，原因係今季主場球衣太多白色元素，38年來首次改用作客球衣出戰北倫敦打吡，令到今場比賽更具話題。
孫興民攰爆難靠
熱刺開季勝負和各一，上埸以1比2不敵紐卡素，雖然一度憑對手烏龍球追平，但防線多次被對手突襲得手，主帥普斯迪高路相信要諗計應付對手高速反擊，否則今場迎戰兵工廠難免陷於苦戰。隊長孫興民雖然喺國際賽取得入球，但踢完「太公波」要舟車勞頓難免影響狀態，新兵箭頭蘇蘭基繼續養傷，今場要攻破兵工廠大門相信並不容易。
阿仙奴上場打少一人之下被白禮頓追和1比1，開季連勝走勢告終，最傷嘅係中場大將迪格蘭賴斯領紅牌，今場要停賽。主帥阿迪達剛續約3年，今場當然唔想失威，不過中場馬田奧迪加特及守將卡拉科利國際賽受傷，阿迪達要變都唔容易，惟有寄望新兵史達寧證明身價。今場雙方各有隱憂，加上受到國際賽期影響，估計今場雙方會小心翼翼，未必會有多入球出現。文:謝德謙
粤公网安备44011302004166号