世亞洲：精銳盡出撲擊國足 日本細顯強者本色_東方日報

世盃亞洲區外圍賽第3圈賽事展開，C組賽事有日本主場迎戰中國。國足上圈喺出局邊緣下死裏逃生，驚險獲得晉級，事實上佢哋整體實力同日本相距甚遠，只能輸少當贏，作客更加會踢得龜縮，留意到日本近6次對中國全開3球或以下，今場隨時又係小勝格，3.5球入球細值得支持。

（周四晚6時35分開賽）
世盃決賽周擴軍至48隊，亞洲區名額增至8.5個，踢到嚟第3圈，3組嘅頭兩名可以直接取得決賽周入場券，對於實力超班嘅日本嚟講，要出線唔算困難，畢竟同組有力威脅佢哋嘅，就只有沙特阿拉伯及澳洲。

不過，日本主帥森保一為省靚「亞洲一哥」招牌，今輪賽期對中國及巴林亦徵召最強陣容出擊，期望開靚個頭；日本大軍27人名單中，有21人外流歐洲，全隊總身價高達2.9億歐元，身價最高嘅久保建英、三笘薰悉數在陣，另一快翼伊東純也亦歸隊坐鎮，人腳極之鼎盛。

作客東瀛一心求守
中國能夠打入第3圈可以話係奇迹，全靠同組泰國對新加坡第2圈最後一場關鍵時刻失波，才得以驚險過關。國足現時並無球員喺歐洲落班，主帥伊萬科維奇只能選出全中超陣容，包括蔣光太、阿蘭、阿卜杜外力及費南多等入籍兵。中國上屆世盃外兩鬥「藍武士」，分別輸0比1及0比2，擺明唔夠踢，今場作客目標簡單，就係死守博1分，捧入球細啱數。