英錦賽：捧伯明翰半大有着素_東方日報

今晚有多場英格蘭聯賽錦標賽事，包括南部A組伯明翰主場對華素爾，英甲球隊伯明翰近況出色，近5場比賽取得4勝，導致今場主W熱爆燈，冇乜肉食。考慮到伯明翰攻強守弱，近4場有3次半場總入球開出2球或以上，寧願博中位數1.5球半場大。（周三凌晨2時45分開賽）

伯明翰上季排英冠尾三，今季降落英甲，但爛船始終有三斤釘，應付英甲賽事綽綽有餘，開季後4場聯賽取得3勝1和，包括盃賽在內，近5戰更加贏4場，當中敗仗係英聯盃不敵英超球隊富咸，雖敗不辱，今場遇到低一級嘅英乙球隊華素爾，預料會採取主攻踢法，力爭贏波。不過，伯明翰防線並唔算穩陣，近4仗都有失波，今場未必可以保持清白之身。

華素爾踢法夠進取
華素爾雖然係乙組仔，但踢法進取，近4仗取得3勝1負入9球，包括喺聯賽盃落後兩球下反勝哈特斯菲爾德3比2，可見球員鬥志非常頑強，就算今場輸波，都應該有能力破蛋。