英社區盾：以攻代守搶頭彩 藍月VS紅魔大激鬥_東方日報

英超開鑼前哨戰嘅社區盾，將會上演「曼市打吡」，英超冠軍曼城喺溫布萊球場大戰英足盃冠軍曼聯，兩支同市死敵季前熱身賽表現一般，尤其防守上出現唔少甩漏，連場炮製多入球賽事，今仗再開3.5球入球大機會甚高。

（Now621及630周六晚10時直播）
曼城目前陣容不整，史東斯、魯賓戴亞斯、基爾獲加、尼敦阿基、洛迪卡斯簡迪等防守球員，夏天踢完歐國盃後一直休息，未喺任何熱身賽上過陣，狀態肯定唔會好。曼城近期比賽由新人鎮守防線下，自然出現大量失誤，只係靠艾寧夏蘭特領導嘅鋒線以攻代守，近4場熱身賽總入球全開4球或以上。

舒克斯有望登場
曼聯方面都唔好得幾多，新加盟嘅法國中堅約羅早前做手術長抖，哈利馬古尼同域陀連迪路夫賽前亦因傷缺練，踢完美洲盃啱啱歸隊嘅利辛度馬天尼斯可能焗住即刻上陣，防線繼續天殘地缺。不過曼聯勝在反擊力強，新前鋒約舒亞舒克斯今場有望披甲，勢必同曼城駁火，3.5球入球大值博。