歐國盃：東歐兵互片例必燦爛 羅馬尼亞夠活力大戰烏克蘭_東方日報

歐國盃E組賽事，羅馬尼亞大戰烏克蘭，呢組4支球隊實力較為平均，隊隊都想博出線肯定打甩髀。東歐球隊向來講究個人技術同着重進攻，羅馬尼亞同烏克蘭就有唔少好波球員，近年對賽都鬥得燦爛，5次交手有4次開3球或以上，梗係要捧2.5球入球大。（Now618周一晚上9時直播）

羅馬尼亞相隔8年再戰歐國盃，喺外圍賽以不敗佳績、壓倒瑞士以首名出線，絕對唔簡單。佢哋嘅年輕化政策進入收成期，伊亞尼斯赫傑、丹尼斯文、達古仙等新世代成功擔起大旗，活力爆燈，正所謂初生之犢不畏虎，難得踢決賽周當然會盡情展示，無懼同烏克蘭鬥攻。

列布夫領軍風格夠進取
烏克蘭喺傳奇前鋒列布夫領軍下，踢法相當進取，前線多位主力都具備數胡能力，西甲神射手多夫碧掛帥，又有梅迪歷、迪斯漢高夫同辛真高等支援，進攻力量非常強大。烏克蘭喺今個月兩場熱身賽1勝1負，兩場都係總入球4球嘅大手交易，今場嘅2.5球入球大好路。