友誼賽：今仗賽後公布大軍名單 英格蘭避重就輕追半細_東方日報

英格蘭歐國盃前最後一場熱身賽，移師溫布萊球場主場迎戰冰島。「三獅兵團」主帥修夫基將於賽後公布26人名單，預計落場球員會點到即止，加上英格蘭近4次主場熱身賽3次半場開1球或以下，1.5球半場細不妨再追。

（Now618周六凌晨2時45分直播）
上場英格蘭熱身賽雖然大炒波斯尼亞3球，高爾彭馬、阿歷山大阿諾特、哈利卡尼都有「士哥」，但上半場互無紀錄，修夫基都承認球員入局慢，要等到下半場開紀錄後才漸入佳境。畢竟只係熱身賽，修夫基睇嚟都會任球員自由發揮，相信今場情況相若，上半場悶戰居多。

現時英格蘭初選名單多達33人，將會有7人被剔除，入選與否其實眾球員都心中有數，近日英國傳媒亦不斷「爆料」落選球員名單，由於今場係歐國盃前最後熱身賽，主力球員們都會避重就輕，避免碰撞導致無謂損傷，落選嘅亦準備放假唔會搏，入球自然唔會太多。

冰島硬淨頂得住
冰島喺歐國附不敵烏克蘭出局，距離決賽周只有一步之遙，冰島整體實力唔差，面對強隊有一定防守力，例如外圍賽兩鬥葡萄牙，都僅以0比2同0比1落敗，上半場全開1球或以下，相信今場面對「三獅兵團」亦會做好防守，特別上半場球員體力充沛，有力阻止對方來犯，半場細值博。