世亞洲：澳洲開波快演入球騷_東方日報

今晚直播頭盤有場強弱懸殊之戰，I組孟加拉主場鬥澳洲。包尾嘅孟加拉4戰得1分失14球，防線弱過藥煲，半場難頂對手猛攻。澳洲4戰全勝提早晉級，實行大踢進攻足球娛樂球迷。雙方近3次對賽上半場總入球全開4球或以上，不妨追1.5球半場大。（on.cc東網周四晚6時45分直播）

魚腩孟加拉志在參與
孟加拉世界排名第163位，正宗「冇骨魚腩」，呢支南亞球隊志在參與，今輪分組賽踢咗4場，除主場打和黎巴嫩1比1之外，其餘3場都輸波，包括作客吞澳洲7蛋，上半場已經落後4球，可見兩隊差距極大，就算今日返地頭比賽，形勢唔會有太大改變。

澳洲過去5屆世盃都進身決賽周，上屆打入16強，僅被最終冠軍阿根廷淘汰。澳洲球員無論技術、體能同速度都遠勝同組對手，4戰全勝之餘入15球兼冇失波，提早晉級下圈。以「袋鼠兵」嘅超班表現，早段有力數多幾粒，半場大值博。