友誼賽：葡萄牙試陣細鍊芬_東方日報

歐國盃列強積極進行熱身賽，今晚葡萄牙喺主場約戰芬蘭。葡萄牙人才鼎盛，領隊馬天尼斯表明決賽周前嘅3場熱身賽，會盡量試用唔同組合，今晚C朗等主力未必會落場，預計球員亦唔會太過搏命，隨時悶戰一場，3.5球入球細屬信心之選。（周三凌晨2時45分開賽）

由於C朗、奧達維奧艾美臣同魯賓尼維斯3人日前先啱啱踢完沙特國王盃，搞到延遲歸隊，今場上陣機會唔大，主帥馬天尼斯亦會趁熱身賽機會觀察球員，畀各入選球員輪流上場。不過葡萄牙仍然好依賴39歲嘅C朗數胡，加上球隊近期進攻表現唔算突出，近4場有3場總入球開3球或以下，今場試陣之下，更加難有期望。

兩軍交鋒例少波入
另邊廂，北歐小國芬蘭冇得踢歐國盃，佢哋青黃不接問題嚴重，前面仲係靠迪姆普基掛帥，作客預計踢番最擅長嘅穩守突擊。睇番葡萄牙過往對親芬蘭都冇乜波入，近7次交手有6次總入球開3球或以下，一於捧3.5球入球細穩陣。