阿甲：小保加搏殺捧客Ｗ_東方日報

周一凌晨阿甲賽事，CA普拉坦斯主場迎戰小保加，兩隊近期聯賽走勢麻麻，肯定想盡快重響勝鼓。作客嘅小保加實力強橫，喺南美球會盃出線後，將會重新專注聯賽向上爬，佢哋嘅星級陣容值得信賴，捧客勝冇甩拖！（HOYTV76台周一凌晨1時30分直播）

小保加喺3場聯賽只得勝和負各一，不過上周中喺南球盃大炒對手國民普托斯4比0出線後，成隊波信心明顯返晒嚟，相信喺淘汰賽開始前可以專心聯賽搏殺。小保加有卡雲尼、馬高斯盧祖、羅美路、賓尼迪圖等星級球員壓陣，實力同經驗都夠晒保證，相信嚟緊戰績會不斷上揚。

CA普拉坦斯未夠班
CA普拉坦斯最近3場聯賽不勝，球員狀態令人失望，上場佢哋打和圖庫曼體育會，更加有後防主力馬斯治食紅牌，搞到今場要坐波監，實力再打折扣。睇番小保加近5次對CA普拉坦斯，小保加獲4勝1和不敗成績，今場必捧客勝。