德乙：韋恩中魔咒下盤有堡證_東方日報

今晚德國聯賽附加賽次回合，韋恩主場再鬥雷根斯堡。首回合兩隊踢成2比2，韋恩始終破唔到近年對住雷根斯堡嘅不勝魔咒，嚟到次回合大家都驚輸，隨時準備好踢加時，雷根斯堡受讓半一，必捧下盤。（Now638周三凌晨2時30分直播）

雷根斯堡對賽有優勢
首回合兩隊踢到拳來腳往，雷根斯堡先入波，下半場韋恩5分鐘內連入兩粒反超前，不過丙組嘅雷根斯堡展現打不死精神，79分鐘追和2比2，由於賽例唔設作客入球優惠，今晚次回合又返到起點，總之邊隊贏下季就喺乙組見。

韋恩喺德乙排尾3，佢哋季尾狀態極之差勁，連同附加賽首回合在內，近10場賽事只得2和8負，即使主場出擊，表現亦冇起色，主場已經錄得5連敗，今場無乜地利可言。雷根斯堡上季降落德丙，今季即有機會重返德乙，陣中不少球員都有豐富經驗，加上兩軍各項賽事近7次正式交手，雷根斯堡獲4勝3和不敗成績，下盤相當好路。