日聯盃：踢出士氣同鹿角鬥攻 町田澤維亞大展實力_東方日報

日聯盃今日上演連場大戰，其中町田澤維亞主場迎戰鹿島鹿角嘅「日職對決」成為焦點。町田澤維亞今季演出神勇，依家做緊日職「一哥」，球員信心爆棚，面對勁旅鹿島鹿角都唔會退縮，兩軍都有強勁火力，今場博中位數2.5球入球大最抵玩。（周三晚上6時開賽）

今季先升班嘅町田澤維亞成為神奇球隊，喺日職殺上榜首位置，呢類奇兵往往都係踢士氣波，上場5比0大炒東京綠茵，肯定會食住個勢採取主動。至於鹿島鹿角狀態亦非常勇猛，由4月底開始頻頻獲勝，近6場比賽錄得5勝1和，而且踢法充滿娛樂性，近7場比賽有6場總入球開出3球或以上，今仗無懼與町田澤維亞鬥攻，一於再追中位數2.5球嘅入球大。

FC橫濱「細」守鯨魚
同時間開賽，另一場FC橫濱主場迎戰名古屋鯨魚，日乙嘅FC橫濱擁有堅固防線，近5場比賽有4場保持不失，屯重兵防守有能力令名古屋鯨魚陷入苦戰。兩隊近年交鋒實力差距唔算太大，近5次對賽有4次總入球開2球或以下，今仗博中位數2.5球嘅細盤。