德甲：勢創歷史！利華半W有堡證_東方日報

周六德甲煞科戰，新任冠軍利華古遜主場迎戰奧格斯堡，今場比賽對利華古遜係歷史性一戰，事關佢哋只要唔輸波，就會成為德甲史上首支全季不敗球隊，意義重大。利華古遜季尾愈戰愈勇，主場出擊必定火力全開搶攻，半場主勝穩開。 （Now 639周六晚上9時30分直播） 利華古遜1個月前已鎖定冠軍，不過佢哋並冇收油，近2場聯賽分別5比1大炒法蘭克福同5比0大勝波琴，而且近4場比賽有3場半場領先，證明球員戰意依然旺盛。利華喺下周四凌晨要踢歐霸盃決賽，今仗會爭取盡早鎖定勝局，再畀主力休息，隨時喺上半場大開殺戒。 奧格斯堡4連敗等放假 奧格斯堡排喺第10位，唔愁降班亦無力爭奪歐洲賽資格，近期表現似乎已經「提早抖暑」，聯賽連輸4場兼被對手攻入12球，月初作客多蒙特踢唔夠半個鐘已被轟3粒，今仗作客利華古遜簡直係以卵擊石，捧半場主勝好路。