英超：爭歐戰入場券唔腳軟 車路士熱刺大火併_東方日報

英超補賽上演「倫敦打吡」，車路士主場惡鬥熱刺。戰果關係住下季幾億收入嘅歐洲賽入場券，雙方肯定會搏命，加上兩軍上輪聯賽齊齊因為詐胡失分，谷埋一肚氣，今場肯定大踢爭氣波，車路士近7次主場，全開4球或以上，3.5球大係不二之選。（Now 621、611周五凌晨2時30分直播） 兩軍近期防守欠穩 車路士上仗對前4嘅阿士東維拉，落後兩球下力追，可惜補時絕殺被VAR推翻未能反勝，但亦顯示車路士鬥心十足。熱刺上仗主場不敵阿仙奴，球隊曾經射門中柱及入球越位被判詐胡，今場當然不希望再於「倫敦打吡」失威，必定與車仔鬥攻。 車仔上場有高爾彭馬病愈復出，見到佢狀態其實未足，參與度唔算高，但仍然可以令球隊進攻上更加流順，今場抖多咗幾日，應該會發揮更大作用。不過渡邊年不只一次強調，車仔後防不穩先至係今年成績飄忽嘅主因，近11場只有1場保持不失。 熱刺後防同樣穿窿，近14場只得1場清白身，淨係近兩場連輸畀紐卡素0比4同阿仙奴2比3，夾埋已經失咗7球，呢個問題一時半刻解決唔到，要等夏天轉會窗先至可以買人，依家唯一可以做嘅就係以攻代守，今場相信都會同車仔鬥攻，入球大絕對玩得過。