中北美冠賽：蒙特雷睇定食有力贏多鋪_東方日報

聽朝中冠盃8強次回合，蒙特雷主場再鬥國際邁亞密。首回合領先2比1嘅蒙特雷，近5場中冠盃全勝，有力再下一城；國際邁亞密就算有「球王」美斯坐鎮，焗攻下隨時輸得更快，主勝睇高一線。（周四早上10時30分開賽） 首回合國際邁亞密雖然領先半場，但下半場中場雷斯被逐後形勢逆轉、蒙特雷即時把握人數上優勢，憑麥斯美沙及佐治洛迪古斯建功，反勝2比1。呢支墨超勁旅現時排聯賽第3位，近況亦對辦，加上喺中冠盃5連勝，主場更添勝算。 國際邁亞密作客唔掂 國際邁亞密喺美斯等「巴塞4子」空降之前，只屬美職墊底球隊，事實上美斯養傷期間球隊即刻唔識贏，雖然呢位阿根廷球王上場聯賽復出，但球隊只能2比2打和科羅拉多急流，加上佢哋近8場作客正式賽事僅得1勝3和4負，焗攻情況下隨時得不償失，主勝好路。