友誼賽：德國荷蘭宿敵大駁火_東方日報

今晚重量級熱身賽有宿敵對決，德國主場火併荷蘭。「日耳曼兵團」上場勇挫法國，信心返晒嚟，加上主場出擊例搶攻，荷蘭近兩場狂轟10粒，火力全開，仇人見面分外眼紅，隨時駁火鬥攻，入球大更值博。（周三凌晨3時45分開賽） 德國少帥拿高斯文擅於變通，今次成功說服卻奧斯出山，有咗呢位老將壓陣，加埋「打手」安特列治傍住，攻守組織暢順晒。「日耳曼兵團」日前作客法國「拍跳」，以雙子星科利安華迪斯及穆斯亞拿，支援箭頭夏維斯，科利安華迪斯開波7秒即轟入世界波，創下德國史上最快入波紀錄，易邊後穆斯亞拿妙傳夏維斯破網贏2比0，呢個新進攻組合產生化學作用，唔講得笑。 主場出擊例多士哥 貴為今屆歐國盃東道主，德國早前熱身賽成績差強人意，甚至畀自己球迷柴台，睇番佢哋近6場主場5次開3球或以上，今場必定主動搶攻，希望喺主場贏波挽回粉絲信心。 另邊廂，荷蘭亦非善男信女，近兩場狂轟10粒，包括上場國際賽以4比0大勝蘇格蘭，「新史奈達」雷恩達斯更交出入波兼助攻，連闊別「橙軍」多時嘅中場韋拿杜姆都有進帳，配合前線嘅迪比、加普同後備中鋒韋格賀斯，火力有保證，唔怕同德國鬥攻，今場實多波入。