歐協：維拉頹勢撐阿積士下盤_東方日報

今晚仲有場歐協聯16強次回合焦點賽事，英超勁旅阿士東維拉主場迎戰阿積士，首回合兩隊踢成0比0，今場再戰相信仍係勢均力敵。維拉近期成績下滑，主場表現同季初更係判若兩隊，維拉今仗絕對讓唔起一球/球半，博下盤好路。 （Now 645周五凌晨4時直播） 維拉下半季表現大幅下滑，上場聯賽主場慘吞熱刺4蛋，事實上維拉近期主場成績極差，對上5仗主場1勝4負，完全失去季初霸氣。 近5主場4次輸波 維拉今屆分組賽主場3戰全勝，不過對住歷基亞、辛連斯基同阿爾克馬爾都係僅贏1粒，今場面對級數更高嘅阿積士，要贏多過1球談何容易。 另邊廂，阿積士經歷開季低潮後，喺教練雲斯捷帶領下已回復穩定，加上英格蘭中場佐敦軒達臣季中加盟，球隊實力得到明顯提升，近7場比賽只輸過1場，今仗作客會以穩守突擊戰術迎敵，預計會係拉鋸戰，下盤穩陣。