日聯：東京綠茵實力未夠班 橫濱水手磨利刀搶W_東方日報

日職首輪壓軸戲，由新升班嘅東京綠茵主場迎戰橫濱水手。東京綠茵相隔16年後再戰日職，呢支以年輕球員為主嘅球隊，實力上與日職列強仍有差距，今仗對手更加係爭標勁旅橫濱水手，搶分機會唔大，客勝可期！（周日下午1時開賽） 東京綠茵今仗移師國立競技場出戰，雖然佢哋相隔16年後成功重返日職，不過球隊季前未見積極增兵，依然靠班年輕球員打江山，加上新球員級數有限，實力同日職列強有明顯差距。而且主帥城福浩戰術比較保守，面對住橫濱水手嘅強大火力攻勢，相信久守必失，被攻陷只係時間上嘅問題。 藉亞冠盃操起狀態 另邊廂，橫濱水手季前有連場亞冠盃進行磨練，上周中亞冠盃就踢到加時，臨完場前憑安達臣盧比斯射入12碼，驚險淘汰曼谷聯。整體球員狀態經過連場激戰已經操起，肯定比主隊東京綠茵更快入局，而且兩隊近4次交鋒，橫濱水手贏出3場，今仗對住新升班嘅東京綠茵，可以直取客勝。