西超盃：4強對決馬體會唔赦艦隊_東方日報

今晚喺中立場沙特阿拉伯舉行嘅西超盃4強上演打吡戰，由皇家馬德里硬撼馬德里體育會。皇馬飽受傷兵問題困擾，而且佢哋喺西超盃經常法定時間贏唔到，撞正硬淨到暈嘅同市死敵馬體會，寧捧讓球客勝。■（周四凌晨3時開賽） 皇馬傷兵多有隱憂 西超盃自2019年改制，由上季西甲冠、亞軍，與上季西盃冠、亞軍，共4隊角逐，但由於皇馬奪西盃之餘，同時亦係聯賽亞軍，因此上季「3哥」馬體會獲得參賽資格，另外兩隊係巴塞（西甲冠軍）同奧沙辛拿（西盃亞軍）。自改制後過去4屆西超盃，「銀河艦隊」曾兩度封王，不過要留意，佢哋之前6場西超盃，法定時間贏得1場，包括2020年決賽互射12碼險勝今仗對手馬體會。何況皇馬傷兵一大籮，艾達米列達奧、阿拉巴及費蘭特文迪仍要倦勤，續用中場曹亞文尼移後出任中堅，後防存隱憂。 馬體會近況一般，尤其係歇冬後首場聯賽以3比4輸畀基羅納，吸取教訓後唔敢輕舉妄動，陣中前鋒基沙文同艾華路莫拉達狀態唔錯，反擊銳利。加上馬體會對親皇馬特別搏命，兩軍近3次碰頭，馬體會法定時間取得1勝2和未輸過，包括上次交手贏3比1，仲有得受讓咁筍，讓球客勝咪錯過。