英總盃：新特蘭紐卡素鬥攻大無畏_東方日報

今晚英足盃爆發東北打吡，英冠嘅新特蘭主場火併英超勁旅紐卡素。打吡戰無分級別，呢兩大同市宿敵每逢碰頭，都踢到飛沙劈石，而且「黑貓」主場嗜攻，撞正傷兵滿營嘅紐卡素實多波入，一於捧2.5球大盤。 （無綫myTV SUPER周六晚8時45分直播） 一度沉淪嘅新特蘭，近年不斷升呢，上季已重返英冠，今季亦位居前列，持續進步。「黑貓」全隊冇乜星味，最出名嘅皇馬中場祖迪比寧咸……個細佬祖比比寧咸，呢位18歲中場的確帶起到隊波，而前鋒積克奇勒今季聯賽已有12球進帳，腳風奇順，佢哋主場出擊分外搶韁，近8次主場有6次開3球或以上，非常進取。 紐卡素雖然比新特蘭高一個級別，但佢哋傷兵一大籮，包括有排抖嘅鋼門尼克普比，哥林威爾遜、捷比亞、祖爾韋洛克、積及梅菲等等，難怪近4場法定時間只得1和3負。 同市打吡唔會縮 不過紐記上仗造訪勁旅利物浦未有退縮，力戰之下最終輸2比4，隨時以攻代守。加上打吡戰場合，已經冇分邊隊實力強弱，大家一定打甩髀，鬥攻格局唔會縮，大盤有計。