英總盃：狼隊弗到漏下盤贏特_東方日報

近3場全勝轟9粒 今晚英足盃第3圈另一場英超內訌，賓福特主場火併狼隊。賓福特愈踢愈沉，5連敗信心跌到落谷底，相反狼隊3連勝之餘，近年交手更加食住「蜜蜂仔」，讓球盤仲有得受讓平半咁筍，一於撐下盤。 （無綫myTV SUPER周六凌晨3時15分直播） 近期英超狀態最曳球隊，非賓福特莫屬，近5場輸晒合共失咗12粒，就算計近8場亦只得1勝7負，佢哋衰到對住同樣沉爆嘅錫菲聯及水晶宮都照輸，其中3場更喺領先之下反勝為敗，嚴重打擊士氣之餘，亦凸顯防守欠集中嘅問題。「蜜蜂仔」今季有箭頭艾雲東尼長期坐波監，本身攻力已經麻麻，依家仲有剛果民主共和國前鋒尤尼韋沙去咗踢非國盃，攻力弱上加弱。 對賽成績秤贏賓福特 另邊廂，狼隊雖然都缺少要為南韓打亞洲盃嘅前鋒黃喜燦，但仍有柏度尼圖、馬菲奧斯根夏等候命，攻力未受太大影響，而且佢哋狀態大勇，連贏3場入9粒，唔講得笑。 何況狼隊從來唔驚賓福特，雙方近4次交鋒，狼隊取得3勝1和未輸過，包括上月尾聯賽造訪「蜜蜂仔」大炒四個一皮，擺明格食格，寧買當頭起，狼隊受讓平半必捧下盤。