英總盃：洛達咸讓球勝有冷味_東方日報

另一支英超球隊富咸，於今晚英足盃第3圈主場迎戰「英冠仔」洛達咸。睇落兩軍強弱懸殊，不過英足盃一向係爆冷溫床，富咸踢親第3圈都踢得勁辛苦，加上有英聯盃4強後顧，洛達咸有機會做巨人殺手，受讓兩球之下，讓球客勝有計。 （無綫myTV SUPER周六凌晨3時30分直播） 齋睇牌面，富咸係英超分子，啱啱先擊敗勁旅阿仙奴反彈，而且近5次主場贏4次，相反洛達咸係英冠包尾大幡，強弱分明。不過波係圓嘅，尤其係爆冷溫床嘅英足盃，乜嘢戰果都有可能發生，而且富咸唔太重視英足盃，喺近7屆第3圈，呢支倫敦球隊雖然有4次晉級，但其中兩次係靠互射12碼出線，單計法定時間只得2勝2和3負，不宜高估。 富咸留力踢英聯盃４強 事實上富咸近5場法定時間只得1勝，喺英超跌到落第13位，狀態麻麻，更重要係佢哋下周中要出戰英聯盃4強首回合，造訪勁旅利物浦，距離入決賽只係差兩場，梗係想搏埋佢，今仗隨時有所保留。 洛達咸雖然係英冠弱旅，但近3場取得1勝2和略見起色，佢哋近年英足盃成績唔突出，但3年前喺第3圈對住愛華頓，激戰至加時先遭淘汰，今遇戰意不明嘅富咸，法定時間或可頂住唔輸，受讓值得捧場。