馬高：祖雲達斯小勝羅馬_星島日報

祖雲達斯經過兩季低潮，今季在意甲費Sir之稱的艾歷基執教下，做番好防守，加上只要單線作戰，成績叫做企返穩少少，以現時在意甲排名第二。作為粉絲，從感情方面，你會覺得係好事，但人老咗就更傾向有場好波睇，球隊打法上仍然保守，穩中求勝，主要靠反擊和死球戰術食胡，其實呢種打法在當今一啲都唔吸引，絕對無法在重視娛樂性的世界，爭取更多粉絲，再將呢啲數字變成收入，才是王道。 若果從球隊成長的角度睇，作為強隊，要守得好其實唔難，但不少球隊每每在建立好防守之後，無法升級轉型，變成在陣地戰時，顯得無從入手，因為從來主攻必難過主守，曼聯、車路士等球隊，都跌倒在這一個關卡。 另一專欄Will仔係車仔粉絲，在他眼中，即使車路士有很高的XG，但由於攻門主要來自反擊，而覺得這是「問題」，其實只是太心急。 想當年高普接手之後，利物浦多年來都係靠反擊食胡，打陣地戰時表現大打折扣，其實都係同一歷史，只要球隊等到一個組合或神級球員，好似馬田奧迪哥特咁，就會升級去另一層次。 不過，重點是你隊波要堅持打進攻足球，才有機會升級，因此我對祖雲達斯的前景仍然悲觀，但今周仍足以小勝羅馬。馬高