澳職：悉尼主場細鍊鳳凰_東方日報

周五澳職賽事，FC悉尼主場出擊，迎戰今季異軍突起嘅威靈頓鳳凰。依家做「1哥」嘅鳳凰今季令人眼前一亮，防守穩健係佳績背後最大原因，今仗作客沉淪嘅FC悉尼有力保持不失，鳳凰一直奉行穩中求勝，今場3.5球入球細值得信賴。（無綫myTV SUPER周五下午4時45分直播） FC悉尼今非昔比，季前流失大量主力後，實力同戰績繼續下滑，演出飄忽不定，依家排喺聯賽尾3位置，近5場聯賽2勝3負。FC悉尼上仗贏包尾嘅西部聯算係挽回多少士氣，不過球隊近5場有3次食白果，開季後仍未試過拎到連勝，主場出擊亦畀唔到球迷信心。 客軍近5場4保不失 威靈頓鳳凰9戰只失7球，係澳職防守最強球隊，近5場聯賽有4次保持不失，近4作客亦只失過1球，當中全部總入球都開3球或以下。鳳凰嘅波蘭射手奧斯卡沙華達受傷缺陣，缺少呢位6場入4球嘅前鋒，今仗造訪悉尼會先鞏固防守，3.5球入球細揀得過。