英聯盃：紐卡素往績佔優受讓有甜頭_東方日報

今晚英聯盃8強重頭戲，車路士主場鬥紐卡素。車仔雖有地利，但佢哋表現飄忽並唔可靠；「喜鵲」近年食住車路士，近4次交手錄2勝2和，包括今季聯賽曾大炒對手4比1，受讓梗係捧讓球客勝。（Hoy TV 77台周三凌晨4時直播） 車仔冇Form飄忽難靠 車仔今季唔使應付歐洲賽，但聯賽表現仍然唔多掂，目前落後前列太多，惟有寄望盃賽。佢哋上圈英聯盃面對布力般流浪，前鋒尼高拉斯積遜、史達寧及高爾彭馬等主力均正選披甲，今晚同紐卡素爭晉級，相信照遣強陣應戰，問題係主帥普捷天奴仲未搵到一套可靠戰術，搞到球員演出不穩，近5場僅得2勝3負，讓唔起紐卡素。 「喜鵲」今季重返歐聯，成績同樣大起大跌，但隨住歐聯出局，佢哋大可專注番本土賽事，加上傷兵逐漸康復，哥林威爾遜、桑恩朗達夫及丹般恩復出披甲，上場即以3比0大炒富咸，天才新星利維斯米利攻入英超處子球，預計今場會繼續獲得重用。睇番紐卡素近年對車仔成績甚佳，上月就曾以4比1輕鬆取勝，有一定心理優勢，受讓抵玩。