英超：護級大戰！愛華頓尼料再搶W_東方日報

英超護級大戰，排尾2嘅般尼主場迎戰尾4嘅愛華頓，為盡快逃離降班漩渦，今場呢3分係志在必得。雖然兩隊都陷入危機，不過愛華頓實力明顯高一班，佢哋被扣分後愈戰愈勇，挾3連勝強勢出擊有望再下一城，客勝可以放心捧場。 （Now 621周日凌晨1時30分直播） 上次對賽般尼吞3蛋 愛華頓依家排尾4只係「假象」，如果唔係因為財政違規被扣10分，佢哋應該排喺第10位。雖然受到重罰，但愛華頓反而更加勇猛，近5場聯賽4勝1和，包括近期連挫紐卡素同車路士，而且「拖肥糖」作客一樣交出好表現，對上6場作客5次贏波，對住般尼未驚過。 被視為降班熱門嘅般尼，近10場聯賽1勝1和8負，領隊高柏尼嘅技術型踢法「眼高手低」，般尼球員明顯未能駕馭，導致攻不銳、守不穩。般尼上個月曾經喺聯賽盃對愛華頓，結果慘吞3蛋出局，兩隊實力有一定距離，愛華頓乘勇有望再贏一場。