西甲：延續神奇遇強都唔怕 基羅納弗爆下盤有揸拿_東方日報

西甲上演「加泰羅尼亞打吡」，「神奇球隊」基羅納作客挑戰巴塞隆拿！基羅納上場聯賽落後華倫西亞1球下反勝，盡顯鬥心，所有賽事近9場獲8勝1和，保持不敗弗到漏，撞正巴塞近排啞火，絕對有機會偷雞，讓球盤受讓一球，基羅納下盤值捧。（Now 632周一凌晨4時直播） 講歷史、講對賽、講地位，唔使審一定係巴塞贏晒，不過基羅納同其他「神奇球隊」唔同之處，佢哋有城市足球集團撐腰，除咗之前唔少人提過嘅，有借將、有錢發展硬件之外，過往唔少呢類球隊，稍有好成績，踢起某幾個球員，就因為球隊財政問題，冬窗或者遠少少夏天已經會賣人，球隊唔會有長遠發展。依家成班基羅納球員唔使煩惱要離開球會，專心為球隊搏殺，隊內氣氛良好，自然會有好成績。 基羅納「接收」曼城新星如中場杜格拉斯雷斯、恩高靴里拉、恩古圖、保羅摩蘭奴及阿歷斯加西亞，而兩名今季加盟嘅烏克蘭國腳杜夫比克及迪斯漢高夫更係關鍵人物，前者為球隊射入7球，後者亦射入3球及提供兩個助攻，令基羅納15戰射入34球，成為西甲入球最多球隊，比皇馬仲多一粒。 羅拔佬頻食白果巴塞啞火 相反巴塞近排啞火，近6場只入得7球，自9月底開始至今13場賽事，從未有一場入波多過兩球，尤其羅拔利雲度夫斯基已經3場食白果，上場鬥馬體會都要靠祖奧菲歷斯神來之筆僅勝，加維受傷亦影響主帥沙維調動。巴塞目前落後基羅納4分，當然想擊敗對方追貼榜首，不過睇近況，佢哋未必咬得入大勇嘅基羅納，讓球盤仲要讓到一球咁多，下盤絕對玩得過，鍾意扒冷嘅朋友，不妨冷敲埋客Ｗ。