英超：急先鋒曼聯速擒般茅_東方日報

今晚英超焦點戰，曼聯主場硬撼般尼茅夫。紅魔近期於聯賽行運一條龍，而且對親中、下游球隊甚有把握，加上嚟緊有歐聯生死大戰對拜仁嘅後顧，今遇般茅必定想速戰速決，半場主勝有計。 （Now 621周六晚11時直播） 曼聯喺英超表現奇佳，單計11月3場贏晒，主帥坦哈格同後衞哈利馬古尼，齊齊獲選上月英超最佳領隊同球員，其中馬古尼從上季被貶去到幾乎離隊，經常蝦碌被恥笑，仲保持職業態度努力操練，終於重獲坦哈格信任兼攞獎，非常勵志。但當然紅魔今季遇強即屈，對住曼城、紐卡素、阿仙奴、熱刺都輸晒，佢哋至今仍位居前列，全靠對住中、下游球隊應贏則贏，近8場聯賽取得6勝2負，6場勝仗就係贏富咸、愛華頓、賓福特等，睇得出佢哋對住呢類球隊確有辦法。 近5次交手4開半W 曼聯喺歐聯A組排緊包尾，下周中對住拜仁唔贏就出局，為免喺呢場生死戰前搏得太盡，今仗對般尼茅夫一定先發制人，於初段鎖定勝局，等一眾主力早啲休息，養精蓄銳備戰拜仁。 般尼茅夫戰績係有回升，近4場聯賽錄得3勝1和，但能夠擊敗紐卡素，只因對手啱啱踢完歐聯攰爆兼傷兵滿營，其餘兩場勝仗係贏沉到爆嘅錫菲聯同水晶宮，今仗對住弗到漏油嘅曼聯，先係真正考驗。事實上，曼聯一向食住般茅，單計近5次交手，紅魔取得4勝1負，而4場勝仗都係上半場已取得領先，今仗勢必速食般茅。