英超：利物浦半場大穩開_東方日報

錫菲聯炒主帥軍心散 今晚英超有一場強弱懸殊之戰，包尾大幡錫菲聯主場硬撼「2哥」利物浦。錫菲聯啱啱炒教頭，軍心不穩，而且初段總係頻頻失波，撞正火力全開嘅利物浦，1.5球半場大捧得過。（Now 623周四凌晨3時30分直播） 錫菲聯今季重返英超，但頭14輪只得1勝2和11負，因此希京保頓一直高踞「被炒領隊」榜首位置，上輪慘吞般尼5蛋後即落鑊，成為今季英超首個落台領隊，球隊搵番韋達回巢救亡。雖然韋達喺2016至2021年執教錫菲聯，亦曾帶隊升班，但匆匆上任未必立即有改善，佢哋經常喺初段未站穩陣腳下頻頻失波，單計近5次聯賽主場出擊已失咗16粒，其中4次半場開2球或以上，防守不穩。 紅軍火力猛入波停不了 另邊廂，利物浦攻力強勁，單計聯賽14場已狂轟32粒，未計周中快車，係今季入波第2多球隊之一，日前對富咸更上演「金球Show」，轟入4個世界波下反勝富咸4比3，熱血到暈。不過要留意，正選門將艾利臣比加因傷倦勤，後備門將基利靴又唔多穩陣，防線存隱憂，今仗隨時以攻代守，希望早早鎖定勝局，既然錫菲聯後防如紙紮，半場大更值博。