巴甲：挾勇態搶分護級 華斯高客勝好路_東方日報

巴甲護級大戰，高士路主場對華斯高，兩隊現時同分，分別排聯賽16及15位，僅多過尾四巴希亞2分，稍有不慎隨時跌入降班區，今仗應會豁出去一搏爭勝。以波論波，華斯高近況佔優，取得聯賽3連勝，可以睇高一線，建議直取更有分頭嘅客勝。（周四早上6時開賽） 高士路2019年降班，今季重返巴甲後，表現力有不逮，踢33場聯賽僅10勝10和13負，即使受到降班威脅，但演出仍然冇起色，近4場聯賽更加輸3次，雖然上場贏福塔雷薩，但都要踢到80分鐘先至攻入全場唯一入波，全取3分亦欠缺說服力，今場隨時打回原形。 高士路近4場3敗 相比之下，華斯高為搶分護級，愈戰愈勇，近3場聯賽全勝，包括擊敗爭標分子保地花高，可見球員士氣及狀態都處於巔峰，今仗遇上護級對手高士路，更加未驚過，若然可以勝出呢場護級「6分波」，上岸機會肯定大增，相信華斯高作客都會採取主動，以3分為目標。華斯高35歲前鋒維基迪腳風非常順，近3次上陣入兩球，高士路防線不穩，恐怕難以招架，華斯高贏波機會高。