意甲：護級前哨戰薩斯索羅獻細_東方日報

意甲周六凌晨「護級前哨戰」，由薩斯索羅主場對沙蘭力坦拿。兩隊今季成績都非常差，薩斯索羅近5場聯賽不勝，包尾嘅沙蘭力坦拿更加係意甲唯一一支未開齋球隊，今次交鋒名副其實係「海軍鬥水兵」，考慮兩隊都係火力疲弱，最好揀2.5球嘅入球細。 （Now 638周六凌晨1時30分直播） 薩斯索羅曾於9月連接爆冷擊敗祖雲達斯及國際米蘭，但只屬曇花一現，好快打回原形，近5場聯賽只有2和3負。薩軍成績差，歸根究底都係因為球會近年不斷放走主力，包括今夏將中場法迪斯外借去國際米蘭，導致更加依賴翼鋒杜文尼高貝拉迪爭取入波，容易被對手防範，令攻力更加疲弱。薩斯索羅近3場聯賽主場僅入1球，恐怕要攻入沙蘭力坦拿大門，絕非易事。 沙蘭力坦拿火力曳到爆 沙蘭力坦拿今季聯賽11戰只有4和7負，成為降班大熱門，佢哋最大問題同樣係進攻，近6場聯賽有5場捧蛋，莫講話贏波，想入番粒都難。加上沙蘭力坦拿近4場作客全敗，其中3場總入球開出2球或以下，既然雙方同樣陷入低谷，寧願博入球細。