歐冠：惡客PSG明恰A米_東方日報

5連勝氣勢勁爆 至於另一場歐聯F組賽事，AC米蘭主場迎戰巴黎聖日耳門（PSG），A米上輪作客PSG淨吞3蛋，跌落小組榜尾，佢哋3戰僅得2和1負，係小組唯一仍未打開勝利之門球隊，今仗再鬥PSG，取勝機會甚微，PSG近期5連勝，而且近4次歐聯對意甲球隊全勝，可謂意甲剋星，再追客勝。（Now 643周三凌晨4時直播） PSG小組3戰2勝1負排榜首，不過出線仲有變數，唔會放軟手腳，佢哋之前試過作客紐卡素大敗1比4，相信今場作客會更小心。 李康仁艾美利腳風順 佢哋近期已經5連勝，上輪對A米仲打起咗李康仁，呢位22歲南韓國腳近3仗取得2入球1助攻，另外17歲新星沙利艾美利亦連續兩場有「士哥」，兩人已成為「麥總」嘅好幫手。 另邊廂，AC米蘭近期表現大跌，小組3戰僅得2分排榜末兼入唔到波，前線拉菲爾利亞奧表現飄忽，仲係要靠老將基奧特；至於後防方面亦唔穩陣，近4場失咗7球，包括近兩次主場對烏甸尼斯同祖雲達斯都輸0比1，可見主場對佢哋並無幫助，今場再戰PSG唔睇好。