英超：盧頓主場擺慣鐵桶 利物浦穩陣波獻細_東方日報

今晚英超尾場，盧頓主場迎戰利物浦。盧頓雖然喺下游掙扎，但勝在夠拚勁，主場出擊玩死守甚少大敗，紅軍對住升班球隊例「輕手」，今仗唔慌多波入，3.5球細盤捧得過。（Now 621及611周一凌晨零時30分直播） 事隔30多載重返英格蘭頂級聯賽嘅盧頓，今季升上英超明顯唔夠班，開咧後打咗10仗聯賽，只得1勝2和7負，若果單計主場亦僅得1和3負，不過要留意3場敗仗都只係輸1粒，呢4仗主場全開3球或以下，包括對住榜首熱刺亦僅輸0比1。加上有主場球迷支持，盧頓踢得分外醒神，用戰意搭夠，二來佢哋有自知之明，尤其喺進攻乏力之下，必定擺鐵桶陣死守，令佢哋就算輸都唔會輸到大大鑊。 紅軍對升班球隊例輕手 另邊廂，利物浦自從10月頭對熱刺一役，被球證同VAR誤判「吹走」入球導致輸波後，各項賽事近6仗取得5勝1和，重上正軌。有別於季初經常先失波情況，單計聯賽紅軍2連勝兼保持清白之身，可見近期防守明顯穩陣番好多，而且佢哋近4次聯賽對住升班球隊，有3次開3球或以下，盧頓死守希望輸少當贏，入球細有計。