Willhappy：沙貝魯根神奇頂級超卓_星島日報

小弟近排忙於學校嘅瑣碎事，加上呢個星期都係本土國內盃賽，好多都係望一望，但真係估唔到拜仁慕尼黑不敵沙貝魯根。 沙貝魯根呢支德丙球隊位於德國西南部，原來已經成立咗120年，一路都喺德國西南地區聯賽打滾，直至2019/20球季先升至德丙，不過都係寂寂無聞。 睇呢隊波就要留意下嚟自恩高斯泰特免費轉會過嚟嘅馬素加奧斯，呢位球員34歲已經好多經驗，加盟後12場德丙加2場德國盃都係交到貨，19次Chances Created，仲有1入球2助攻，可以話認真唔錯。加奧斯係來自德素多夫嘅青訓，雖然一路都係浮沉於德乙德丙，定位都係中堅，不過真係進攻型，上場對拜仁佢補時6分鐘射入嗰球波，入到禁區撞射，可以見到佢有相當嘅膽識，絕殺拜仁真係人生高峰。 第二位功臣當然係左閘法比奧迪米捷利，其中一幕最精彩就係以一敵二，先過甘美治再過利萊辛尼，真係睇到呆咗，仲可以喺白界線前出到波。而呢位球員只係20歲，真係可造之才。查此子源於禾夫斯堡嘅青訓，去到沙貝魯根都只係租借，睇嚟今季只要好好表現，重返德甲隨時一鳴驚人。 沙貝魯根嚟緊神奇之旅可唔可以繼續行落去，即管睇下下一輪嘅抽籤籤運如何。Willhappy